Политиката се наметна врз синдикалните блокади за повисока минимална плата. За премиерот Мицкоски, тие имаат политичка позадина. Опозицијата, пак, рано утринава дотрча во собранието да поднесе предлог закон за минимална плата. На прашањето дали ќе се седне на маса да се разговара за ова прашање, Мицкоски и денеска го повтори ставот кои го кажуваат и неговите колеги веќе извесен период – „се што ќе се договорат работодавачите и синдикатите, ние ќе го поддржиме“.
„Во бипартитниот дијалог меѓу работодавачите и работниците, ние сме фасилитатор. И рековме ќе го поддржиме секое решение кое практично тие ќе го договорат. Но, политички инструирани самонаречени водачи не можеме да поддржуваме“, изјави премиерот Христијан Мицкоски.
Опозицијата, пак, повторно го поднесе предлог законот за минимална плата, откако претходно беше вратен поради технички недостатоци. Претседателот на партијата Филипче смета дека Владата има пари да го зголеми минималецот.
„Оваа влада која ја тера државата во изолација, вчера да најавува купување на нов владин авион, тоа е расипништво од невиден степен и исмевање во лице на овие луѓе кои протестираат“, рече претседатело на СДСМ, Венко Филипче.
По сето ова се поставува прашањето дали се оди кон генерален штрајк, нешто што синдикатите го најавија како последна фаза од нивната борба за раст на платите. Инаку, со законското зголемување минималецот во март треба да порасне околу 1.600 денари.
Ирена Чачкова