Седницата на собраниската комисија за избори и именување за утврдување на кандидатската листа за нов државен обвинител најверојатно ќе биде наредната недела, изјави за Телма претседателот на комисијата Ѓорѓи Сајковски. Досега се пријавени 5 кандидати, а еве дел од нивните биографии.
Конкурсот е завршен, но Собранието ќе почека уште неколку дена за евентуална кандидатура за нов државен обвинител испратена по пошта. Досега се пријавиле 5 кандидати, три обвинителки, еден судија и еден разрешен судија.
Свои кандидатури до собранието испратиле Владимир Панчевски, Лидија Раичевиќ, Ленче Ристоска, Ненад Савевски и Анита Тополова – Исајловска.
Исајловска е актуелен в.д. државен обвинител и назначена по оставката на Љупчо Коцевски, обвинителка е од 2009-та и со 7 години кариера ги прескокнува сите три скалила во хиерархијата, од основен до обвинител во државното обвинителство каде стапува на функција на 44-годишна функција во 2016-та година. Се обиде да го сопре предметот за нелегално финансисрање на ВМРО-ДПМНЕ во предметот на СЈО, Талир, но нејзиното БЗЗ не беше прифатено од Врховниот суд.
-Мотивите поради кои одлучив да се пријавам за функцијата се пред се моето долгогодишно професионално искуство, институционалниот ангажман и непосредниот увид во досегашното функционирање на јавнообвинителскиот систем на сите нивоа, поради кои сметам дека можам искрено и реално да придонесам за подобрување на состојбите во обвинителството, одговори на прашањата на Телма, актуелната државна обвинителка Тополова-Исајловска.
На случајот Талир како обвинител работи и втората кандидатка Ленче Ристоска, поранешна обвинителка во СЈО која сега е македонски обвинител за врска со Еуроџаст, европскиот механизам за правда и истраги. Со нејзино барање е замрзант имотот и белата палата на ВМРО-ДПМНЕ, а владеачката партија ја спречи нејзината кандидатура за судот во Стразбур. Поради навредливите критики таа ја тужеше партијата на Мицкоски кој јавно критикува за нејзината улога во СЈО.
Лидија Раичевиќ е обвинителка во скопско обвинителство и го води случајот за финансиските злоупотреби со спортските ваучери во кој го гонеше поранешниот директор на Агенцијата за спорт и претседателот на Македонскиот олимписки комитет. Претходно беше и обвинителка во обвинителството за гонење организиран криминал и по трет пат се кандидира.
Ненад Савевски е судија кривичар во скопскиот суд во одделот за гонење организиран криминал, а го судеше предметот за убиството на мигрантката Фатмата. Претходно беше обвинител и еден од двајца кандидати кои имаат завршено Академија за судија и обвинители.
Последниот на листата, а прв со официјално објавена кандидатура е поранешниот претседател на скопскиот кривичен суд Владимир Панчевски кој беше осуден за злоупотреби со АКМИС системот иако пресудата се влечеше со години низ судскиот систем. Интересно е што една од одлуките со која му одбива жалба ја потпишал актуелниот притворен апелационен судија Ѓоко Ристов.
Во условите за државен обвинител не е наведена неосудуваност на кандидати. По комплетирањето на кандидатската листа, таа се испраќа во влада која ќе чека мислење за сите пријавени од Советот на обвинители и ќе го утврди својот предлог.
Миомир Серафиновиќ