Првите преброени гласачки ливчиња од референдумот за законот за асистирано доброволно прекинување на животот, одржан во Словенија во недела, покажуваат многу тесен резултат.
По пребројувањето на 48,56 проценти од гласачките ливчиња, 47,23 проценти гласале „за“ (131.649 гласачи), 52,78 проценти гласале „против“ (147.121 гласач).
Законот ќе биде отфрлен на референдумот доколку мнозинството гласачи гласаат против него и под услов најмалку една петтина од сите гласачи со право на глас да гласаат против него, објавува Анадолу.
Според најновите податоци за бројот на гласачи, најмалку 339.205 гласачи би требало да гласаат „против“.
Конечните и потврдени резултати од референдумот, како што објавија локалните медиуми, ќе бидат познати дури по 4 декември.
Иницијаторот на денешниот референдум, Алеш Примц, по затворањето на гласачките места оцени дека кампањата била долга и заморна. Тој сака болните, лицата со попреченост и пензионерите да победат денес, за да можат да живеат мирно и безбедно. Тој е убеден дека ова би било и порака до државата дека мора да го зајакне здравството, а не да нуди смрт.
На референдумот во недела, словенечките граѓани гласаа дали законот за легализација на асистирано умирање, усвоен од парламентот во јули, треба да стапи на сила или да биде суспендиран.
Во јули, парламентот на оваа членка на Европската Унија донесе закон со кој ќе им се дозволи на терминално болните лица да си инјектираат супстанца што ќе им го прекине животот, под услов да се исцрпени сите опции за лекување и да нема шанси за закрепнување.
Правниот акт предизвика многу контроверзии во земјата, а неговите противници успеаја да обезбедат втор референдум за ова прашање за две години. На необврзувачкиот референдум во 2024 година, 55 проценти од гласачите го поддржаа правото на асистирано умирање.
За да биде суспендиран законот, мнозинството од оние што гласаа на референдумот мора да кажат „не“ и најмалку 20 проценти од 1,7 милиони гласачи со право на глас мора да гласале на референдумот.
Доколку законот остане на сила, Словенија ќе им се придружи на неколку земји од Европската Унија кои веќе усвоија слични закони, вклучувајќи ги Швајцарија и Австрија.