Вицепремиерот и министер за транспорт Александар Николоски и неговиот бугарски колега Гроздан Караџов денеска го потпишуваат договорот за подготовка, изградба и оперативност на меѓуграничниот железнички тунел на Коридорот 8. Церемонијата се одржува на железничката станица Ѓуешево, а на неа најавено е присуство и претставници на ЕУ, НАТО, САД, Светска банка и Европската банка за обнова и развој. Изградбата на тунелот ќе претставува клучна меѓугранична точка за Македонија и Бугарија, со проектирана должина од 2,4 километри, од кои 1,2 километри се на македонска територија. Министерството за транспорт истакнува дека проектот има економско значење за регионот, но и безбедносно значење во рамки на НАТО. Во моментов, делницата од Бељаковце до Крива Паланка е во фаза на изградба, додека подготовките за третата делница од Крива Паланка до границата со Бугарија, која ќе ја опфати и тунелот, се во тек. По завршувањето на сите делници, Коридорот 8 ќе овозможи побрз и побезбеден железнички транспорт меѓу двете земји.
