Културната иницијатива „Една песна, една Европа“, која го слави заедничкото наследство и креативниот дух на Европа обедини на едно место 12 врвни музичари од земјите на ЕУ и Западен Балкан.
„Со генерации луѓето ширум Западен Балкан и земјите-членки на ЕУ растеле со истите песни и вредности. Денес, без разлика дали во дигиталниот или физичкиот свет, културата и понатаму е мост што ги обединува генерациите, народите и нивните стремежи“, велат организаторите на овој настан кој деновиве се реализира во Скопје во Националната филхармонија.
- „Една песна, една Европа“ е проект на WeBalkans комуникации кој е финансиран од Европската Унија. Ние се собравме овде да ја отсвириме „Ода на радоста“, односно на „Ода на радоста“ која веќе постои да ѝ дадеме еден призвук на земјите од Западен Балкан. Но, во истовреме да ги поканиме и музичарите од земјите-членки на Европската Унија- Самра Лучкин, менаџер за стратешки комуникации во WeBalkans.
- Имаме многу моќна порака. Сум патувал насекаде низ светот соработувајќи со музичари од многу култури, од тука, од Африка, од Азија и сите ние го зборуваме истиот јазик, се сакаме меѓусебе. Не се занимаваме со политика, раси или религија. Споделуваме нешто убаво и моќни сме со оваа порака, да го видиме светот обединет. Сите треба да се сакаме и почитуваме едни со други- Мајк дел Феро, пијанист од Холандија.
- Среќен сум што сум дел од овој проект „Една песна, една Европа“. Чувството е убаво дека има многу музичари од Балканот и од Европа. Со дел од нив се знаеме, со дел пак ова е можност да се запознаеме. И поминавме многу убаво на проба- Серџук Алимов, трубач од Македонија.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.