Ракописот „Џинџуџе“ на писателот Ермис Лафазановски, ја освои наградата „ Оливера Николова“, на првиот конкурс за најдобар необјавен роман за деца и млади. За наградата што ја востанови издавачката куќа „Арс Ламина“, со поддршка на семејството на истакнатата македонска писателка Оливера Николова, пристигнале 38 ракописи од 37 автори. А, во најтесениот избор бил и романот „Сам во рој“ од Иван Дричко – псевдоним на Сашо Кокаланов, стои во објавата на жири комисијата во состав : Оливера Ќорвезировска, Весна Мојсова- Чепишевска и Јагода Михајловска- Георгиева.
- „Романот ’Џинџуџе‘ од истакнатиот македонски писател Ермис Лафазановски е модерна бајка за потрагата по среќа, ситуирана во наше време и на наш простор. Бајковидноста и вештото и духовито реферирање на фолклорната традиција во романот остварени преку еден џин и едно џуџе (односно преку едно огромно и едно ситно дете), се исправени пред предизвиците на современиот живот обединети во таканаречената ’мол-култура‘ како неизбежен факт на нашето време. Џинџуџе е заедничко (и уметничко) име на двајца најдобри пријатели, џинот и џуџето, кои функционираат како едно суштество. Зближени по принципот на разлики и контрасти (едниот е огромен и силен, интелектуално инфериорен; другиот е ситен и немоќен, интелектуално супериорен), пријателите се досетливи акробати кои изведуваат точки со велосипед низ Скопје, а особено во Сити мол. ‘Џинџуџе’ е прво дело за деца и млади од Ермис Лафазановски. Освен што романот е вистинско освежување во домашната продукција, тој најверојатно, според новата терминологија на spin off-постапката во денешните серии, е и прв книжевен приквел (prequel) на друго познато дело од истиот автор. Имено, романот за деца и млади ‘Џинџуџе’ е можно раскажувачко минато на истоимениот расказ за возрасни од збирката „Туја“ на Лафазановски од 2018 година, застапен во Малата антологија на современата македонска микрофикција ‘Летаат приказни’ од 2019; расказ според кој беше именувана и антологијата на македонскиот краток расказ ‘Џинџуџе во земјата на афионите’ од 2022 година. Овој приквел-роман на несекојдневен начин ги поврзува книжевноста за деца и онаа за возрасни. Во таа смисла, ’Џинџуџе‘ е и оригинален омаж на Оливера Николова којашто пишуваше и за деца и за возрасни; омаж кој ни отвора интересни прашања за тоа како целното раскажување за возрасни може да премине во раскажување за деца, и обратно; како роман може да протече од расказ, и обратно“, се вели во образложението на жирито.
Ермис Лафазановски (1961) е истакнат македонски раскажувач, романсиер, историчар и теоретичар на литературата, доктор по филолошки науки. Работи во Институтот за фолклор „Марко Цепенков“ во Скопје и бил негов долгогодишен директор. Член е на Друштвото на писателите на Македонија и на Македонскиот ПЕН-центар, чијшто претседател бил од 2014 до 2018 година. Има објавено повеќе трудови од областа на книжевноста и културната антропологија и има дадено значаен придонес во современата македонска проза. Добитник е на неколку книжевни признанија (наградата „Стале Попов“ на ДПМ и наградата „Прозни мајстори“ што ја доделува фондацијата „Македонија презент“). Неговиот книжевен опус се состои од повеќе романи: „Благородник“, „Опишувач“, „Роман за оружјето“, „Храпешко“, „Недела“, „Историја на луѓето кои умреа од страв“; неколку збирки раскази – „Половина божилак“, „Кога во Скопје ги беа измислиле чадорите“, „Егзотична кантата“, „Туја“; како и повеќе научни студии, зборници и монографии – „Традиција, нарација, литература“, „Македонските космогониски легенди“, „Текст и менталитет“, „Антрополошки дијалози“… Лафазановски преведува од романски јазик и досега има преведено повеќе од дваесет книги од современи романски автори.
Наградата „Оливера Николова“ за најдобар необјавен роман за деца и млади е востановена на 11 март 2025 година, на денот на раѓањето на Оливера Николова – првиот без нејзиното физичко присуство меѓу нас. Николова почина на 3 ноември 2024 година.
„Арс Ламина“ денеска (11 септември 2025) го распиша вториот конкурс за наградата „Оливера Николова“, за најдобар необјавен роман за деца и млади за 2026 година. Тој ќе биде отворен до 11 јануари 2026 година.
