Тегобноста на поединецот на маргините на системот и борбата за слободно да се реализара како индивидуа, е темата на претставата „ Ангели во Америка“, чија премиерна изведба вечерва во Македонскиот народен театар ќе го означи почетокот на новата сезона. Претставата ја постави Филип Петковски, кој е автор на драматизацијата и на преводот на наградениот текст со Пулицерова, Тони и други награди , од истакнатиот современ американски драматичар Тони Кушнер.
- Животот на заедници кои живеат на маргините е нешто што не е доволно застапено генерално во театар, односно и во драматургијата генерално, па затоа ова е еден , да речеме отскок не само поради тоа, туку и затоа што се работи за маестрален текст, кој што на многу хуманистички начин прикажува многу луѓе и многу заедници кои денес се доста негирани, кажа режисерот Филип Петковски.
Низ повеќеслојно напишаната драма за четворица хомосексуалци и една хетеросексуална жена во 80- тите години на 20 век во САД, кога се појавува Сидата , доаѓаат до израз конфликтите на ликовите со околината и со себе си. А, нивниот трагизам низ перото на Кушнер, е доловен преку повеќе комични мигови.
- Луис е огледало на сите нас. Колку ги живееме и на кој начин, идеалите во кои ние веруваме, вели актерот Александар Стоименовски за неговиот лик Луис, зад кој се крие авторот Тони Кушнер.
- Сите луѓе имаат некои работи што ги потиснуваат , без разлика какви се. И како тие работи ти ќе ги доживееш или ликот Џо како ги доживува, кажа актерот Стефан Спасов за неговиот лик Џо Пит.
- Главната емиција која што јас сакам да ја издвојам кај Харпер , е застоеноста во едно место, болката дека не може да избега од местото каде што се наоѓа . Тоа го вклучува и неверството од страна на нејзиниот сопруг. Исто така и растењето во една конзервативна средина, рече актерката Наталија Теодосиева за нејзиниот лик Харпер.
Во претставата е вклучен и ликот од реалноста- адвокатот Рој Кон , кого го толкува Јордан Симонов. Настапуваат и Илин Јовановски, Тања Кочовска, Дамјан Цветановски и Нела Павловска.
За сценoграфското решение, дополнето со ротација и играта на модули , беше задолжен Мартин Манев. Костимите се на Антонија Гугинска- Јорданоска , а кореографијата е на Иван Ангелковски.
Претставата „ Ангели во Америка“ ќе ја има првата реприза утревечер.
Сотир Трајков