На сцената на Македонскиот народен театар на 16 и 17 декември ќе се одржи премиера на претставата „Замисли нов свет“. Работена е според седум текстови и извадоци од интервјуа на нашиот драматичар Горан Стефановски кои што за теми ги имаат идентитетот, јазот меѓу генерациите и општествените аномалии. Драматизацијата ја направи Ана Ристоска-Трпеноска, а режијата ја потпишува Нела Витошевиќ. Во претставата играат актери од МНТ, од Драмски и млади кои допрва ќе бидат вработени, а по 20 години на сцената се враќа и актерката Верица Недеска. Продуцент на претставата е Сектор Филм, а таа е копродукција меѓу МНТ и Телеком.
„Особено ни е важно МНТ да создава и продуцира дела кои што се од самофинансирање , или се поддржани од големи компании како што е Телеком. Тоа ни е од особено значење, бидејќи е значаен пример дека театарот може , освен од државната каса т.е. од Министерството за култура, да наоѓа и алтернативни начини на самофинансирање“, рече Никола Кимовски, в.д. директор на МНТ.
„Сакавме да ја подвлечеме моќта на приказната и моќта на театарот, да создава нови и поинакви приказни. За таа цел одбравме неколку сцени -7 од култни дела на Горан Стефановски, од првата фаза од неговото творештво и една драма, да речеме од втората фаза“, кажа Нела Витошевиќ, режисерка на претставата.
