Во дербито во НБА-лигата утринава, Милвоки на домашен паркет го совлада Денвер со 112-95. Јанис Адетокумпо имаше 36 поени, 18 скока и пет асистенции, додека Демијан Лилард имаше 18 поени. Кај шампионот, очекувано најдобар беше Никола Јокиќ со 29 поени, 12 скока и 8 асистенции, но немаше доволно помош од соиграчите.
Лука Дончиќ стигна до десеттиот трипл-дабл сезонава во победата од 112-104 против Вашингтон. Словенецот постигна 26 поени, 15 асистенции и 11 скока. Кајри Ирвинг исто така имаше 26 поени за Маверикс, додека кај гостите Дени Авдија со 25 поени беше најефикасен.
Првиот пик на драфтот Виктор Вембањама со необичен трипл-дабл го водеше Сан Антонио до триумф од 122-95 на гости кај Торонто со што Спарс ја прекинаа низата од седум порази по ред. Французинот имаше 27 поени, 14 скока и 10 блокади. Вембањама е само четвртиот руки, а прв уште од Дејвид Робинсон во 1990 година што запишал трипл-дабл со 10 блокади.
На останатите натпревари, Минесота како гостин го победи Лос Анџелес клиперс со 121-110, Голден стејт исто така оствари гостински триумф кај Јута со 129-107, а победи остварија и Њу Орлеанс, Хјустон, Чикаго, Филаделфија и Шарлот.