Фудбалот наскоро ќе влезе во нова експериментална ера, бидејќи оние кои ги креираат правилата на играта планираат да воведат и син картон за време на натпреварите. Меѓународниот одбор на фудбалските сојузи се очекува утре официјално да ја презентира идејата.
Покрај жолтите и црвените картони кои се употребуваат во фудбалот од Светското првенство во 1970 година за да се санкционираат играчите, во иднина судиите можеби ќе покажуваат и сини картони.
Се очекува првите експериментални натпревари да бидат во некоја од пониските професионални лиги, бидејќи елитниот фудбал на почеток ќе биде исклучен од пробниот период. Син картон ќе се доделува ако фудбалерот направи намерен прекршок со кој ќе се прекине опасна акција на противникот или чиста шанса за гол, но и за недолично однесување кон судијата. Ваквата санкција ќе значи дека фудбалерот ќе мора да го напушти натпреварот на 10 минути.
Два сини картони или комбинација од жолт и син картон, автоматски ќе значи исклучување, односно црвен картон.
Можно е синиот картон да биде употребуван и во англискиот ФА Куп веќе од следната сезона, но не на сите натпревари. Интересно е тоа што УЕФА и претседателот Александер Чеферин уште минатата недела ја офрлија оваа идеја за син картон во фудбалот. Барем засега ова ново правило нема да биде тестирано на натпревари организирани од УЕФА.