Фудбалерот на турскиот прволигаш Адана, Јован Манев повторно е дел од репрезентацијата на Македонија и е во конкуренција за место во националниот тим кој в петок во Скопје ја пречекува Украина, а в понеделник на Олд Трафорд во Манчестер ќе се соочи со Англија.
“Веќе влеговме во последната фаза од подготовките за мечот против Украина. Навистина не очекуваат многу тешки натпревари. Оптимисти сме, ќе дадеме се од себе да ги победиме Украинците, фокусирани сме на тој натпревар, но нема да биде лесно. Имаме голема почит кон противникот, Украина е талентиран и одличен тим. Тоа го потврдија и на синоќешниот пријателски натпревар против Германија”, рече Манев.
Дваесет и две годишниот Манев е еден од неколку фудбалери од помладата генерација кој веќе доби шанса да дебитира во дресот на репрезентацијата и повторно трпеливо ја очекува шансата од селекторот Благоја Милевски.
“Верувам дека ние помладите даваме дополнителен импулс во нашата репрезентација. Се разбира дека имаме голема почит кон поискусните. Тие се наша голема поддршка. Верувам дека заеднички придонесуваме за подобра енергија во тимот. Важно е да ги исполниме задачите од селекторот. Ако тоа го направиме на терен, убеден сум дека ќе оствариме позитивен резултат”, заврши Манев.
ФОТО: Игор Паневски