Навивачката група Комити организира акција за спас на ФК Вардар. Најверните симпатизери на најтрофејниот македонски фудбалски клуб почнаа со донаторска акција за да запре агонијата на „црвено-црните“.
Вардар се наоѓа во очајна состојба, а фудбалерите речиси цела сезона немаат добиено ниту една плата. Сопственикот Слободан Крстевски јавно призна дека повеќе не може да го финансира клубот и на Комитите им предаде 25 отсто од акциите.
Очигледно нема ништо од најавените странски инвестирори кои требаше да го спасат клубот, па Комити решија да ги преземат работите во свои раце. Тие преку апликацијата „Gofundme.com“ ќе се обидат да соберат што е можно повеќе средства за да го вратат клубот на старите славни патеки.
Секој ќе може да донира колкава сума сака, а акцијата ќе биде транспарентна и парите исклучиво ќе бидат наменети за клубот. За потсетување Вардар, заврши на третото место на табелата во Втората лига и сега ќе игра бараж натпревар со Скопје за влез во Првата лига на 21 мај во Кавадарци.
Донација за ФК Вардар можете да направите на следниот ЛИНК.