Македонската фудбалска репрезентација вечерва од 20 часот и 45 минути против Малта ќе го одигра првиот натпревар од квалификациите за Европското првенство.
Составот предводен од селекторот Благоја Милевски го има статусот на фаворит, но сите фудбалери во еден глас потенцираат дека во мечот влегуваат со голем респект за противникот, но со максимално залагање да стигнат до посакуваната победа.
“Се освен три бода во дуелот против Малта за нас не е добар резултат. Поквалитетни сме од репрезентацијата на Малта, не треба да криеме дека сме фаворити на овој натпревар, но во него влегуваме со максимален респект за противникот. Уште со самиот почеток треба да тргнеме со полна сила и со максимално залагање да стигнеме до трите бода”, изјави напаѓачот Илија Несторовски.
Македонија зад себе има пласман на континенталниот шампионат, а беше и на чекор до учество на Мундијалот во Катар. Оваа генерација посакува повторно да биде дел од големо натпреварување и затоа е потребно максимално залагање на секој меч во овој циклус.
“Според последните резултати на овој тим, пласман на Европско првенство, финале во баражот за настап на Светскиот шампионат амбициите сигурно се големи. Но, сето тоа мораме да го заборавиме и да се фокусираме на тоа што не очекува. Посебно за овој прв натпревар со Малта. За нас е многу важно да почнеме со победа бидејќи нашата цел во оваа тешка група е да забележиме што е можно повисок пласман. Знаеме дека можеме да играме против сите репрезентации, но на секој натпревар мораме да одиграме најдобро што можеме”, заврши Несторовски.
ФОТО: Игор Паневски