Се намалуваат правата на над 130 илјади вработени во јавниот сектор. Новиот предлог-закон за плати не уредува како да се зголемат платите, но одредува исплата на основна плата без стаж и други додатоци за време на годишен одмор. Владата има намера оваа појава, веќе забележана во правосудството, да ја прошири на сите институции, реагира Синдикатот.
УПОЗ смета дека законот ќе направи хаос со воведувањето потсистеми, зашто секоја институција треба посебно да ги воведува новите правила. Уште полошо, ќе влијае на укинување на колективните договори. Конечно, системски закон не смее да се носи без социјален дијалог и со исклучување на синдикатите.
Неколку дена пред Нова Година, Министерството за администрација го објави законот на ЕНЕР. Го претстави како унифицирање на платите, „еднаква плата за работа со еднаква вредност“ и раст на платите во конекција со минималната плата. До средината на февруари ќе се организираат јавни дебати и расправи за подобрување на текстот, кој ќе биде отворен за сугестии и забелешки. Законот опфаќа над илјада и 300 државни институции.
Соња Николовска