Актерот Никола Ристановски освои награда за најдобра машка улога на фестивалот „ Нов тврдина театар“, кој се одржа во Нови Сад. Ристановски е награден за ликот на д-р Томас Стокман, што го толкува во претставата „ Народен непријател“, со која МНТ настапи на фестивалот. Претставата по текстот на Хенрик Ибзен ја постави режисерката Нина Николиќ. Таа беше прогласена за најдобра на годинашниов МТФ „ Војдан Чернодрински“, а Ристановски и таму освои награда за најдобра машка улога. Претставата „ Народен непријател“ , е дел од повеќегодишниот европски проект во кој беше вклучен МНТ, насловен „ Патиштата на хероите“.
Во официјалната програма на 9 фестивал „ Нов тврдина театар“ учествуваат 6 претстави од најголемите театарски куќи во регионот.
За наградите одлучуваше жири-комисијата во состав: Ласло Блашковиќ, писател (претседател на жирито), Јована Балашевиќ, актерка, и Ивана Ѓуриќ- Пауновиќ, литературен преведувач.
Ристановски, веќе 30 години успешно ја гради својата актерска кариера во Македонија, но и надвор од нејзините граници. Остварил огромен број театарски, филмски и телевизиски улоги и воедно е најтрофејниот актер во историјата на македонскиот театар.
Претставата „Народен непријател“ на 5 ноември ќе гостува во Италија.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.