-Врз основа на членот 84, став 1, алинеја прва од Уставот на Република Северна Македонија и известувањето за предлогот за мандатар доставено од СДСМ, а поддржано од политичките партии во состав на коалцијата кои заедно го имаат мнозинството пропишано со Уставот во Собранието, за мандатар за состав на владата го определувам Димитар Ковачевски, рече Стево Пендаровски, Претседател на РСМ.
Ковачевски порача дека уште од денес ќе започне со консултации за новиот владин кабинет со луѓе кои ќе треба да одговорат на сериозните предизвици кои следат : економската криза, Ковид пандемијата, решеавање на спорот со Бугарија. Вети дека негова лична заложба ќе биде враќање на довербата на граѓаните во институциите, чесно и одговорно владеење.
На Ковачевски му остануваат 20 дена за состав на новата програма и владиниот кабинет, но според неговите проценки предлогот до Собранието ќе се достави и порано од законскиот рок, веднаш по божиќните празници.
Очекувањата се собраниската седница за изборот на новата Влада да се одржи најдоцна до средината на јануари. Расправата трае два дена. Во однос на министерските позиции нови имања се очекуваат од СДСМ, кај ДУИ нема да има промени освен што тие го добиваат секторот земјоделство а на Алтернатива и го отстапуваат информатичко општество и администрација.
Паријата на Гаши ќе има и министри за здравство и без ресор задолжен за дијаспората.Новата Влада има парламентарна поддрѓка од 64 пратеници.
Јулијана Пешевска