Коронавирусот силно удри во Премиерлигата па веќе се зборува за целосно стопирање на натпреварите до почетокот на следната година.
Утринава Премиерлигата го одложи натпреварот помеѓу Лестер сити и Тотнем што беше закажан за вечерва поради Ковид-19. Во таборот на Лестер има голем број на позитивни случаи на вирусот, а истиот проблем минатата недела го имаше Тотнем. Одложен е уште еден од натпревар од англиската елита, а тоа е средбата помеѓу Манчестер и Брајтон што требаше да се одигра во сабота. Тоа е вкупно петти одложен натпревар оваа недела во Премиерлигата.
Челси е последниот тим, што пријави позитивни случаи на ковид во своите редови, а претходно тоа го направија вкупно пет клубови.
Последните информации од Англија велат дека клубовите планираат да побараат од Премиерлигата, натпреварите да бидат суспендирани додека се справат со Ковид-19, бидејќи секојдневно се појавуваат нови случаи.
Паузата би траела до 7 јануари идната година и би бил прескокнат традиционалниот „Боксинг деј“ или згуснатиот распоред на натпревари за време на божиќните и новогодишните празници.
Последниот клуб кој денеска пријави голем број на позитивни случаи на Ковид-19 во своите редови е Реал Мадрид. Покрај Лука Модриќ и Марсело, со вирусот се заразиле и Марко Асенсио, Родриго, резервниот голман Андреј Лунин и Герет Бејл.
