Македонската кошаркарска репрезентација доживеа пораз на гостувањето кај Украина во рамки на квалификациите за Светското првенство. Доброто прво полувреме не беше доволно да направиме изненадување во Киев.
Играта на Македонија во првата и втората четвртина не наговестуваше убедлив пораз во Украина од 78-61. Имавме постојано водство од почетокот на натпреварот, а во вториот период и највисоки +8. На полувремето заминавме со водство од 30-34.
Украинците во вториот дел тргнаа со серија од 11-3, па го преземаа водството и не го испуштија до крајот. Бевме во игра за позитивен резултат до стартот на последната четвртина, кога нашата игра комплетно се распадна, а Украинците погодуваа од секоја позиција, особено за три поени, за конечни 78-61.
Бојан Крстевски со 14 поени беше најефикасен во нашата репрезентација, додека Џејкоб Вајле постигна 12. Артем Пустовиј со 18 поени најмногу се истакна во домашната селекција.
Македонија сега има два порази од два натпревари, откако во петокот загубивме и од Шпанија на домашен паркет. Квалификациите за Светското првенство продолжуваат во февруари идната година, кога нашата селекција игра двомеч со Грузија.