Двајца индијци и двајца пакистанци се осомничени за разбојништво и за нелегално оружје затоа што на 4-ти јуни навечер, во близина на Транзитниот центар Табановце нападнале и ограбиле тројца мигранти што оделе пеш кон Србија.
Обвинителството бара притвор за 4-цата средноазиски разбојници кои предводеле 20-члена банда кај Табановце биле вооружени со пиштол, а своите жртви во петокот навечер ги нападнале со палки и ги претепале. Водачот на бандата дури со пиштол марка Зораки испукал два куршуми во земја за да ги заплаши бегалците кои патувале по балканската мигрантска рута.
Трите жртви биле ограбени, двајца останале без 50 евра, еден без 200 евра, а на сите им биле украдени и мобилните телефони. Од нападот имале повеќе лесни и тешки телесни повреди. Обвинителството не соопшти што станало со остатокот од бандата која броела дваесетина членови.
Во продолжение: соопштение на обвинителството
Поради основано сомнение дека четири лица сториле по едно кривично дело Разбојништво од член 237 став 4 во врска со став 1, а еден од нив и кривично дело Неовластено изработување, држење, посредување и тргување со оружје или распрскувачки материи од член 396 став 1 од Кривичниот законик, Основното јавно обвинителство Куманово за нив донесе Наредба за спроведување истражна постапка. Јавниот обвинител за осомничените, од кои двајца се државјани на Република Индија, останатите на Исламска Република Пакистан, поднесе Предлог за определување на мерката притвор до надлежниот суд.
На 4 јуни 2021 година, околу 21,00 часот во близина на Транзитниот центар Табановце, во состав на група од околу дваесет лица со употреба на сила, опасно орудие и огнено оружје, осомничените од други лица одзеле туѓи подвижни предмети со намера противправно да ги присвојат. Имено, додека три лица – оштетени се движеле пеш во близина на транзитниот центар Табановце со намера да ја преминат границата кон Република Србија, биле нападнати од група од околу дваесeт лица, меѓу кои биле и осомничените. Притоа еден од осомничените во рацете држел пиштол марка „Зораки-М 906-Т“, додека останатите во рацете држеле стапови и палки, а на појасите имале и ножеви. Кога ги запреле оштетените, еден од осомничените започнал да им издава наредби на останатите, велејќи им „удри“, „земи им ги парите и телефоните“, „пукај“, при што осомничените лица започнале со напад и при тоа им задале повеќе удари со стапови и палки на оштетените во предел на главите и телата, а биле испукани и два истрели во земја. При нападот од оштетените биле одземени по 50 евра или 200 евра, како и мобилните телефони, при што им биле нанесени и повеќе лесни и тешки телесни повреди.