„Фавипиравирот“ доби дозвола за интервентен увез во земјава и до крајот на неделава се очекува да стигне во Македонија. Од Агенцијата за лекови и медицински средства – МАЛМЕД информираат дека досега најголем интерес за негова покажале приватните болници.
„Во моментов генерално барањата дојдоа повеќе од нашите болници. Тие што дојдоа беа разгледани и одобрени. Една компанија сака да го увезе оригиналниот лек „авиганот“ од Јапонија, имајќи во предвид дека тешко се наоѓаат количини низ Европа и целиот свет, верувам дека брзо ќе го донесат тука“, вели Љирим Шабани, директор на Агенцијата за лекови и медициснки средства – МАЛМЕД.
Шабани информира дека „фавипиравирот“ кој ќе биде увезен во земјава ќе биде од земји каде лекот е веќе регистриран.
„Ние моментално одобривме количини од Јапонија и од Турција. Тие се двата производители за кои имавме барања да ги одобриме и тие два ги одобривме“, вели Шабани.
Увезените количини, како што неофицијално дознава Телма, ќе бидат минимални и најмногу ќе бидат наменет само за болничко лекување, а тешко ќе се наоѓа во аптеките, со оглед дека неговото користење треба да е под строг медицински надзор поради евентулани контраиндикации кои може да ги предизвика. Сепак турската „Фавира“ можеше да се најде на црниот пазар во земјава по цена од 100 до 300 евра, главно прошверцуван од Косово.
„Ние тој лек го одобривме по барање од лекарите и мислам дека така и треба да оди и понатаму. Кога ќе дојде во државата начинот на пропишување и издавањето треба да оди строго преку лекарски рецепти и доктори специјалисти“, вели Шабани.
Инаку лекот и досега се користеше на Инфективните клиники во земјава за лечење на заболени со коронавирус, но беше увезен како донација.
Цената на лекот по кој тој ќе се продава во земјава се уште не е утврдена, од Агенцијата на тоа чекаат од Министерството за здравство. Производната цена во Турција на „фавипиравирот“ е 50 евра.
„Фавипиравир“ не е регистриран како лек во Македонија, што како процедура трае со месеци, па поради тоа увозот се прави како интервентен. Шабани информира дека истата процедура за интервентен увоз ќе се примени и кога ќе треба да се увезе вакцината против коронавирусот, за да не се губи време околу регистрација на вакцините.
Тамара Грнчароска