Субвенции за извоз на илјадници тони винско грозје во странство- ова е предлогот на владиниот тим предводен од премиерот Заев и министерот за земјоделие Аријанит Џафери кој е даден во Кавадарци по двочасовната средба со лозарите.
Премиерот во изјавата рече дека е понудена нова помош за откупувачите на винско грозје кои ќе може во странство да го извезуваат откупеното грозје. Доколку извезат до 12 милиони тони винско грозје откупувачите ќе добијат по два денари субвенција, доколку се извезе до 25 милиони килограми винско грозје за секој килограм ќе добијат по 3 денари субвенција, а доколку извозот на винско грозје надмине 25 милиони килограми субвенцијата ќе изнесува 4 денари по килограм.
Целта е да се откупат и извезат сите вишоци на грозје, истакна Заев кој побара разбирање за состојбата и правични цени и од винарските визби за да се надмине тешката лозарска година. На сила остануваат и субвенциите за лозарите кои ќе продадат грозје на винариите, како и државната помош за транспортот на вино за извоз.