Предлогот на новата влада ќе биде доставен до Собранието на почетокот од идната недела. Иако најавите и очекувањата беа тоа да се случи утре, можно е да се одложи поради превирањата во ДУИ околу министерските места. Крајниот рок за доставување на предлогот за нова влада до Собранието е 2 септември или уште седум работни дена.
Неофицијалните информации се дека денеска, најдоцна утре треба да се расчистат работите во ДУИ за тоа, кои ќе бидат конечните имиња кои ќе бидат предложени за министри, за што викендов имало средби на претставници од штабот во Мала Речица со претставници на незадоволните крила на партијата во Чаир и во Сарај, а не е исклучено утре да биде одржан и состанок на раководството на партијата.
Незадоволството најмногу е поради предлогот Артан Груби да седне во вицепремиерската фотелја, задолежен за политички систем и Бујар Османи да биде иден шеф на дипломатијата, додека двете крила на ДУИ од Сарај и Чаир се лути дека не добиле ниту едно функционерско место.
Иако се чинеше дека духовите во ДУИ се смирени откако поранешниот градоначаник на Чаир Изет Меџити лично во петокот, во име на мнозинството во Собранието го предложи за кандидатот за претседател, Талат Џафаери, за кого сите 15 пратеници на ДУИ кренаа рака, неизвесноста околу тоа кога ќе биде поднесен предлогот за новата влада, покажува дека воените секири во ДУИ тогаш биле само времено закопани. Од ДУИ денеска никој не беше достапен за информација што се случува во партијата околу имињата за министри и дали нивната листа е конечна, откако вчера на неа беше додадено и последното име за иден министер за информатичко општество и администрација, Јетон Шаќири.
Информациите се дека со тоа се смирило струшкото крило на ДУИ, кое исто така спред неофицијалните информации било незадоволно од првичните кадровски решенија на за министри.
Од СДСМ за Телма информираат дека нивната листа на министри е конечна и оти очекуваат целата листа на министри да биде доставена до Собранието на почетокот од претстојната недела. Кандидатите за министри од СДСМ веќе до партијата ги доставиле своите биографии кои со предлогот за идната влада ќе биде доставена до Собранието.
Но освен во редовите на мнозинството во Собранието, неизвесност околу новата влада има и во редовите на опозицијата.
Во ВМРО-ДПМНЕ се уште не решиле дали ќе гласаат или ќе ја бојкотираат собраниската седница за новата влада и информираат дека дополнително ќе известат за начинот на кој на денот на гласање ќе го кажат своето „не“ за идната влада.
Тамара Грнчароска