Министерските ресори се поделени, а персоналните решенија веќе договорени. Ќе бидат соопштени дури на крајот од денот, кога ќе ги поминат филтрите на партиските органи. Во новата Влада, со која 4 години минус 100 дена ќе раководи мандатарот Зоран Заев, ќе има министри од СДСМ, БЕСА и ДУИ, додека коалициските партнери може да сметаат на другите ешалони.
Оливер Спасовски од технички премиер ќе се врати во Министерството за внатрешни работи, а Венко Филипче ќе остане министер за здравство. Со Секретаријатот за европски прашања ќе раководи Никола Димитров а Радмила Шеќеринска ќе го задржи ресорот одбрана. Култура, што по долго време се враќа во СДСМ, ја презема Ирена Стефовска. Мила Царовска ќе биде министерка за образование а со нејзиниот претходен ресор, труд и социјална политика, ќе раководи Јагода Шахпаска, додека нов министер за правда ќе биде Бојан Маричиќ. Благој Бочварски ќе раководи со транспорт и врски а Горан Милевски го задржува министерството за локална самоуправа. Фатмир Битиќи ќе биде новиот вицепремиер за економија a генералниот секретар на СДСМ Љупчо Николовски го добива новоформираното вицепремиерско место за координација на инспекциските служби и борба против корупција.
Кај ДУИ, договорени се речиси сите министерски позиции. Артан Груби ќе раководи со новото Министерство за политички систем и ќе биде прв вицепремиер, како што потврди за Телма. Бујар Османи, со богато министерско искуство во здравство и во евроинтеграции, ќе биде министер за надворешни работи. Фатмир Бесими, кој исто така има министерско искуство во ресорите евроинтеграции, економија и одбрана, сега ќе го преземе ресорот финансии. Во животна средина останува Насер Нуредини, а во економија Кресник Бектеши. Во ДУИ се уште се разговара дали министерството за информатичко општество ќе и биде доверено на Ширет Елези или на друг партиски кадар.