Синоќа избила тепачка меѓу неколку членови од илинденската коњаница од една страна и крушевчанец од друга страна. Инцидентот се случил на Гумење, а тепачката била прекината од полицаец кој патролирал таму.
Како што јавија од МВР, полицискиот службеник кој вршел патролна служба на Гумење, забележал тепачка помеѓу лице од Крушево од едната страна, и петмина скопјани од коњаницата Лисиче од другата страна. Заради спречување на тепачката, како што информираат од МВР, полицаецот со службениот пиштол испукал еден предупредувачки куршум, пришто тепачката престанала.
Реагираше и градоначалникот на Крушево кој рече дека биле забележани повеќе нарушувања на јавниот ред и мир со карање, физички напади, меѓусебни тепачки, групирања, забави, а со тоа и непочитување на мерките, препораките и протоколите. Христовски ги повика граѓаните, особено коњаницата на мирно и достоинствено чествување на празникот Илинден.
Во Крушево нема место за насилници, вандали и нивно нечовечко однесување со демонстрирање сила или моќ врз мирното население во пресрет на празникот, додава тој.