Веб страните на министерството за здравство и на министерството за образование и наука не функционираат, а првичните информации се дека станува збор за хакерски напади од македонската експозитура на Анонимуси. Во моментот не функционираат веб страните www.mon.gov.mk (образование) и www.zdravstvo.gov.mk (здравство)
Истрагите се во тек и во двете министерства. Покрај тоа што не работи сајтот на министерството за здравство, не функционираат ниту службените адреси на електронска пошта, меѓу кои и е и имејлот на министерот Венко Филипче.
Од здравство соопштија дека привремено комуницираат со јавноста преку новоотворена имејл адреса. Очекуваат повеќе детали за причините за падот на веб страната од истрагата на информатичкиот сектор.
Уште синоќа падна веб страната на министерството за образование. И таму првично е утврдено дека станува збор за хакерски напад кој го турнал сајтот.
И двете министерства се обидуваат да ги стават во функција веб страните преку кои се обезбедуваат услуги и информации за граѓаните меѓу кои и мерките и начинот на лекување во време на пандемија со корона вирус.
На денот на изборите имаше масовни хакерски напади, беше турната и веб страницата со изборните резултати на ДИК, а хакерски напад привремено го онеспособи и агрегаторот тајм.мк.
Полицијата се уште ги истражува изборните хакерски напади. Побарани се информации и од повеќе полициски информатички служби од држави во Европа и во Азија од каде потекнувале адреси преку кои се одвивале хакерските напади на 15-ти јули.