ВМРО-ДПМНЕ обвини дека претседателот на СДСМ, Венко Филипче, ги поддржува бугарските барања за уставни измени, додека партијата останува на позиција за заштита на македонските национални интереси.
„Уставните измени не се последната, туку првата отстапка од низата барања кои Бугарија сака да ги наметне на Македонија. Отворањето на Уставот значи отворање на Пандорината кутија за нови условувања, нови притисоци и нови удари врз македонскиот идентитет“, наведуваат од партијата.
Од ВМРО-ДПМНЕ оценуваат дека политиките на СДСМ и ДУИ ја довеле државата во подредена позиција и создале простор за постојани притисоци кон земјата.
„Наместо заштита на националните интереси, СДС прифаќаше договори кои беа во корист на туѓи, а не на македонските позиции“, се вели во соопштението.
Партијата тврди дека Филипче е „најгласен промотор“ на ваквите политики и дека безусловно ги поддржува барањата кои доаѓаат од Софија. Во соопштението се наведува и дека мнозинството граѓани ја поддржуваат надворешната политика на ВМРО-ДПМНЕ, додека довербата во СДСМ опаѓа.
„Македонија нема да прифаќа нови условувања, нема да тргува со својот идентитет и нема да дозволи националните интереси повторно да бидат жртвувани за нечии политички кариери. Времето на капитулации заврши“, порачуваат од ВМРО-ДПМНЕ.