Со 62 гласа „против“ и 21 „за“ пратениците не ја изгласаа интерпелацијата за работата на министерот за земјоделство, шумарство и водостопанство, Цветан Трипуновски.
Интерпелацијата беше поднесена од пратениците на СДСМ и Коалицијата за европска иднина, кои обвинија за лоши резултати во земјоделството, намалени субвенции, неисполнети ветувања и незадоволство кај земјоделците.
Во своето обраќање, Трипуновски ги отфрли обвинувањата како неосновани и истакна дека Владата наследила презадолжен и запоставен сектор.
Тој нагласи дека во 2025 година извозот на земјоделски производи е зголемен за 85 милиони евра и дека се бележи раст на откупот, оценувајќи дека земјоделците имаат вистински партнер во институциите.
Од опозицијата побараа политичка одговорност и оставка од министерот, тврдејќи дека состојбата во земјоделството се влошува.
По повеќечасовна расправа со спротивставени ставови меѓу власта и опозицијата, мнозинството пратеници ја отфрлија интерпелацијата, а Трипуновски порача дека ќе продолжи со реформите и поддршката на земјоделците.