На маргините на Самитот на Процесот за соработка во Југоисточна Европа во Софија, претседателката Гордана Сиљановска-Давкова оствари средба со бугарската претседателка Илијана Јотова. Во фокусот на разговорите беа актуелните прашања во билатералните односи и македонскиот евроинтегративен процес.
Соговорничките разменија ставови за можните решенија за отпочнување на пристапните преговори на Македонија со Европската Унија, при што беа изнесени различни гледишта околу надминувањето на постојните предизвици.
Давкова ја нагласи потребата од поголема соработка меѓу образовните, научните и културните институции, како и меѓу граѓанските организации, со цел надминување на предрасудите и градење меѓусебно разбирање.
Таа ја потенцираше и важноста од спроведувањето на пресудите на Европскиот суд за човекови права, додека двете претседателки се согласија дека дијалогот за отворените прашања треба да продолжи.
