Израелските воздушни напади убиле најмалку 17 лица во јужен Либан, јавуваат либанските медиуми.
Според либанската државна новинска агенција, девет лица загинале во серија напади врз градот Тајр Деба.
Во меѓувреме, про-иранската вооружена група Хезболах соопшти дека извршила нови напади врз израелски војници кои окупираат делови од јужен Либан.
Претходниот ден, според извештаите, 15 лица биле убиени во израелски напади во Либан, додека Израел го отфрлил предупредувањето од Иран да не ја продолжува својата кампања против Хезболах.
Иранските лидери бараат секој договор за завршување на војната меѓу Иран, САД и Израел да го опфати и Либан, што дополнително ги комплицира преговорите со американскиот претседател Трамп.
Израелските воздушни и артилериски напади денеска се засилиле низ јужниот дел на земјата, при што биле погодени повеќе градови, населени места и села.
Агенцијата наведува дека девет лица загинале кога израелски авиони и дронови извршиле најмалку четири напади врз Тајр Деба, источно од пристанишниот град Тир.
Во два израелски напади во селото Деир Канун ел Нахр биле убиени три лица , додека две лица загинале во Седикин, југоисточно од Тир.
Подоцна бил извршен напад во центарот на градотСидон, кој се наоѓа на брегот, приближно на половина пат меѓу Тир и главниот град Бејрут.
Новинар на агенцијата AFP изјавил дека слушнал експлозија, по што видел автомобил во пламен. Спасувачите извлекле две лица од возилото.
Автомобилот бил цел на израелски дрон, а двете лица починале.
Израелската војска засега не даде непосреден коментар за овие напади во средата, но претходно соопшти дека во вторникот погодила шест инфраструктурни објекти на Хезболах во Тир, како и подготвени ракетни лансери во неколку други области на јужен Либан.