Опожарените шуми на планините Беласица, Огражден и Плачковица во струмичко-радовишкиот регион ќе се обновуваат според насоките на Инспекторатот за шумарство и ловство, вели заменик генералниот директор на национални шуми, Кире Михаилов. Тој појаснува дека се направени проценки на површините и соодветно насоките ќе се третира земјиштето акде што имало пожар.
„Ние како институција пристапивме секаде сериозно. На дел од тие поседи каде инспекторатот даде насоки да видиме што ќе се случи ние така постапивме. Имаше приземни пожари, каде што беше зафатена само трева и тие садници ќе опстанат и ќе вегетираат. Каде имаше голем пожар повторно постапувавме по насоки на Инспекторатот за шумарство и ловство“, вели Кире Михаилов, заменик генерален директор на „Национални шуми“.
Пошумувањето на овие површини ќе биде со автохтони садници кои ги имало и кои може да опстанат на соодветната почва и надморска височина. Сепак, големите пожари не беа единствените проблеми на овие шуми. Михаилов вели дека се бореле и со многу дрвокрадци.
„Морам да потенцирам дека во моментов на Огражден сè уште има истрага. Се утврди нелегално сечење, дека некои површини се опустошени. После сето тоа ќе следува фазата пошумување“, додава Михаилов.
На планината Огражден пролетва веќе се пошумуваше. Дел од површината беше онаа зафатена со огнената стихија од пред две години, додека дел бил природна голина. Таму се засадија садници на костен и даб.
Сузана Мицева