Државата не инвестира доволно во заштита на жените и децата жртви на семејно насилство и надлежните институции треба да знаат дека тоа се нивни законски обврски. Според анализата која ја изработи Националната мрежа против насилство врз жените и семејно насилство не се потребни само дополнителни средства, туку и целосно функционален систем достапен и пристапен на национално ниво.
- Ако сакаме да воспоставиме целосно функционален систем што ќе опфаќа една национална СОС линија, којашто ќе ги опфаќа десетте упатни центри за силување, ќе обезбеди долготрајна психо-социјална поддршка за жртвите од силување ќе обезбеди најмалку 28 засолништа, 19 советувалишта и бесплатна правна помош за жртвите ќе чини на годишно ниво околу 7 милиони евра – проф. д-р Катерина Шапкова – Коцева, Правен факултет „Јустинијан Први“.
Во моментов недостигаат специјализирани сервиси, што подразбира засолништа (шелтер центри) и таму проблемот е најалармантен. Шелтeри на тајна локација мора да постојат, затоа што секогаш има жени и деца чиј живот е во висок ризик, но тоа не е доволно, вели Димушевска.
- Но во значајно поголем број треба да бидат шелтрите од отворен тип како што постојат во сите европски земји и во САД. Од отворен тип значи дека жената може да се движи, тоа е всушност услуга за домување, жената може да се движи, може да оди на работа, може да оди на обуки, може да оди на психолог, да ги носи децата, да може да продолжат со нормално функционирање колку што е возможно– Елена Димушевска, извршна директорка на Националната мрежа против насилство врз жените и семејно насилство.
Според податоците на Министерството за внатрешни работи секојдневно се зголемува бројот на пријави за семејно насилство и тоа особено по самоубиството на Ивана, меѓутоа во исто време државата не презема мерки да ги подобри услугите, смета Чаловска -Димовска .
- И тоа што се случува впрочем е малку неодговорно, ние да ги охрабруваме жените да ги повикуваме да пријават насилството. Тие навистина се исплашија и почнаа тоа да го прават, а во исто време не се инвестира за да се зголемат услугите, така што можеме буквално да се доведеме во една ситуација жената пријавила, но што потоа? – м-р Неда Чаловска -Димовска, адвокатка и експертка за родово засновано насилство.
Во меѓувреме најавија дека ќе достават претставка до Комисијата за спречување и заштита од дискриминација бидејќи Министерството за здравство веќе пет години не го воспоставило сервисот за долготрајна психо -социјална поддршка на жртвите на силување каде 90% се жени и покрај тоа што тоа го пишува во Законот за спречување насилство врз жени уште во 2021 година.
Нина Стефанова
Б.С