Со нови сведочења денеска продолжи судскиот процес за трагичниот пожар во кочанската дискотека „Пулс“, во кој загинаа 63 лица, а повеќе од 200 млади беа повредени.
Пред судот емотивно сведочеше придружниот вокал на групата ДНК, Ана Костадиновска, која бендот го нарече свое „второ семејство“. Кобната ноќ ја опиша како „хорор филм“.
Таа раскажа дека бендот пристигнал околу 22 часот на генерална проба. Прскалки имало поставено и претходно кога настапувале во дискотеката и, како што рече, никогаш немало проблем. Но, за време на изведбата на песната „Што сака нека биде“, почувствувала силна топлина, по што избувнал пламен.
„Панчо ги повика сите да излезат“, сведочеше Костадиновска. Во обид да се спасат, забележала врата под бината, но таа била заклучена со катанец, па продолжиле кон главниот излез. Таму настанала гужва и стампедо, при што и самата останала заглавена во толпата.
Раскажа дека во просторот се чувствувал специфичен мирис што, според неа, „ги терал луѓето на спиење“. Описот беше потресен – течност капела врз нејзината кожа и имала чувство како да ја гори некој со цигари. Од пламенот успеало да ја извлече непознато момче, на кое му должи живот.
Сведочењето беше проследено со силни емоции во судницата. Како втор сведок се појави гитаристот Горан Тонев. Во текот на рочиштето, адвокатот Петар Шилегов побара одложување, посочувајќи дека постојат „двојни аршини“ во постапувањето на службениците на МВР и обвинителството. Судот го одби барањето, образложувајќи дека нема законска основа за одлагање.
Обвинителството, предводено од Борче Јанев, инсистира на утврдување лична и институционална одговорност за трагедијата. Одбраната, пак, тврди дека станува збор за системски пропусти, а не за индивидуална вина.
Родителите на настраданите уште еднаш упатија апел за целосна вистина и правда.
Од судот известува репортерката Елена Ивановска Мукоска