„Историски успешно“ – вака премиерот Христијан Мицкоски го опиша своето учество на три панели со светската бизнис-елита и компании чија вредност се мери во трилиони. Најави дека разговорите од форумските маси во Давос наскоро ќе се претворат во големи енергетски и инфраструктурни проекти.
Како конкретен чекор, на маса се Чебрен, Галиште и Бошков Мост, инвестиции од околу две милијарди евра кои во следните 7 до 10 години треба да отклучат дел од 400-те милијарди потенцијал што ѝ стои на државата секоја година. Се разгледувале и можностите во делот на вештачката интелигенција, дигиталното општество и дата-центрите.
Претседателот на Владата вели дека имал средби и со државници присутни во Давос, но без детали.
- „Јас не бев статист таму или по ходници да барам селфи со учесниците на Давос туку бев активен учесник на три панели и морам да кажам, штета што не можеме да ги објавиме моите говори, но сите беа проследени со аплауз од страна на присутните. Нашата меѓународна активност дали е изолирана или не – гледаат граѓаните, тие се тие коишто кажуваат на избори и тие се тие што го даваат својот глас. Можам само да кажам дека времето на дипломатија на свиткана кичма и снисходливост на црвените дебели килими помина“, изјави премиерот Христијан Мицкоски.
Пред два дена, социјалдемократите остро го критикуваа настапот на македонската делегација во Давос. Ја обвинија власта за економски и инвестициски неуспех, наспроти поширок политички проект насочен кон преземање контрола врз клучни стратешки сектори, како телекомуникациите.
- „Дипломатската изолација на Мицкоски се покажа во Давос. Премиерот немаше ниту една средба со светски или европски лидер. Се снимаше по ходници и тераше туризам на сметка на граѓаните“, велат од СДСМ.
Околу односите со опозицијата и отворените прашања, премиерот Мицкоски денеска остана воздржан и без конкретен став за повлекувањето на поддршката од опозицијата од албанскиот блок, за Законот за прекршоци. Околу можноста за средба со лидерот на ДУИ, Ахмети, премиерот вели – „ќе се случи некогаш“.
Петар Догов
Б.С.