Во собраниската Комисија за политички систем и односи меѓу заедниците денеска се одржува амандманска расправа за Предлог-законот за изменување и дополнување на Кривичниот законик во второ читање.
Законот е поднесен од девет пратеници од ВМРО-ДПМНЕ, а за него се поднесени вкупно 13 амандмани од пратеници на НСДП, Левица, ВМРО-ДПМНЕ и ЛДП.
Предложените измени имаат за цел отстранување на слабостите во постојните одредби и усогласување со одлуката на Уставниот суд од февруари 2025 година, како и со забелешките на Европската комисија.
Се предвидува заострување на казнената политика за кривичните дела злоупотреба на службената положба и злосторничко здружување, како и проширување на примената на проширената конфискација.
Со измените се воведува и ново кривично дело – злоупотреба на туѓи снимки, фотографии и аудиозаписи со сексуално експлицитна содржина, со цел подобра заштита на приватноста.
Дополнително, се врши усогласување со Истанбулската конвенција и се предлагаат измени кај делата поврзани со семејно и родово базирано насилство, трговија со деца и безбедност во сообраќајот.