Актерката Тамарa Ристоска е избрана да учествува на престижната програма Берлинале талентс на годинашниот Берлински филмски фестивал, кој ќе се одржи до 13 до 23 февруари. На 23. издание на оваа програма Ристоска е избрана меѓу 3,836 пријавени од 123 држави, а таа е единствената учесничка од регионот.
Основана во 2003-та година, Берлинале талентс е платформа за развој на филмски таленти, која ја истражува уметноста и процесот на создавање филмови..
Оваа година Берлинале талентс се одржува под мотото Listen Courageously – Cinematic Narratives in Times of Dissonance, фокусирајќи се на значењето и важноста на слушањето во уметноста. Во изминатите години, учесници на главните теми биле ѕвезди како Мартин Скорсезе, Кејт Бланшет и Кристен Стјуарт.
Актерскиот опус на Ристоска вклучува улоги во филмовите „Мими“, „Return to Silent Hill“ и „Verified Target“, потоа краткометражните „Проблемот на Тина“ и „Обичната Ели“, како и македонските ТВ-серии „Фамилијата Марковски“ и „Тинејџерски Камп“.
Нејзини нови проекти се улогите во режисерското деби на Сара Климоска „Нова енергија“, филмот „Лубарда“ на Горан Радовановиќ, како и „Рака на правдата“ (Ruka Pravde) на Немања Ќераниќ, каде ја игра една од главните улоги.