Според, информации на Телма, на 15 ноември универзалниот снабдувач ЕВН ХОУМ ќе го објави тендерот на кој ЕСМ треба да достави понуда за тоа по која цена ќе ја продава својата струја во следниот период. Сега цената на мегават час од електрани чини 60 евра. Дали ќе биде повисока или пак може би ќе се намали треба да се знае до крајот на идниот месец.
Според информациите, за два дена односно на 24 месецов, ЕЛЕКТРОДИСТРИБУЦИЈА треба да објави пак повик на кој ќе се избира понуда со цена на струјата со која ќе се покриваат загубите. Енергетските компании веќе ги доставиле и пресметките за трошоците, регулаторна ги анализира. Сите овие параметри влегуваат во крајната цена на електричната енергија за домаќинствата. Но, најмногу каква ќе биде таа ќе зависи од тоа каква цена ќе понуди ЕСМ.
Компанијата извесен период работи лошо. Пoради тоа што Владата одлучи да не им дава пари од буџетот, тие од домашните банки побараа кредит од 80 милиони евра. Исто така, неизвесно е кога граѓаните ќе добијат уште еден час дневна евтина струја. Иако се планираше наместо до 15 домаќинствата да ја користат до 16 часот, поради состојбите на пазарите за сега тоа нема да се случи, затоа што ќе мора да се укине евтината тарифа по 22 часот која граѓаните најмногу ја користат.
