Пожарот што изби меѓу штипските села Долани и Љуботен е ставен под контрола, откако огнените јазици зафатија нискостеблеста шума и сува трева.
Брзата интервенција на пожарникарите спречи проширување кон блиската борова шума и населеното место Долани.
Во гаснењето учествуваа 18 пожарникари, 14 доброволци и жители од селото, а со механизација беа направени противпожарни појаси за ограничување на пламените јазици.
При интервенцијата е повреден еден жител кој се здобил со изгореници на нозете.
Иако ситуацијата е под контрола, на одредени места сè уште се забележува чад од тешкопристапен терен, па надлежните служби остануваат будно да ја следат ситуацијата и најавуваат можност за дополнителна воздушна интервенција доколку е потребно.
Ова е трет поголем пожар во штипскиот регион во последните неколку дена.