Вардар драстично ослабен вечерва од 20:45 часот му гостува на Монпелје во првиот натпревар од четвртфиналето во ЕХФ Европска лига. Тренерот Иван Чупиќ не може да смета на двајцата клучни играчи.
„Црвено-црните“ отпатуваа во Франција без Јака Малус и Дмитро Хориха, кои се и најдобри стрелци на тимот. Според неофицијални информации, Малус има повреда, додека Хориха е болен и го пропушти и последниот натпревар во домашното првенство против Алкалоид.
Дуелите меѓу Монпелје и Вардар важат за вистинска класика, но во Лига на шампиони. Двата поранешни европски шампиони досега се сретнале 11 пати во елитното натпреварување, а ова ќе биде нивна прва пресметка во второто по ранг клупско натпреварување.
Интересен е и билансот во Франција – Монпелје нема победа на домашен терен против Вардар. На пет гостувања, македонскиот тим има четири победи и едно реми, остварено во првиот меѓусебен дуел во 2014 година. Сепак, францускиот тим има слатка одмазда – триумфот од 28-27 во полуфиналето на фајнл-форот во Келн во 2018 година, по што стигна и до титулата.
Вечерашниот натпревар ќе биде вистински тест за карактерот на актуелниот состав на Вардар. Самодовербата од доминацијата во домашното првенство и солидната европска сезона – со осум победи и само два порази – треба да биде дополнителен мотив.
Реваншот од четвртфиналето се игра на 5 мај во Скопје, во салата „Јане Сандански“.
ФОТО: РК Вардар/Фејсбук