Антикорупционерите констатираа сериозни слабости во финансирањето на изборната кампања за локалните избори минатата година. Според наодите од најновиот извештај на Државната комисија за спречување на корупцијата (ДКСК), над половина од учесниците во изборниот процес не доставиле финансиски извештаи.
Вкупните средства за финансирање на кампањата изнесуваат околу девет милиони евра од кои, речиси, половина се обезбедени од државниот буџет за политичко рекламирање, за што Комисијата предупредува дека носи корупциски ризици. Во извештајот се посочува и дека постоечката законска рамка има значителни недостатоци.
„Клучни области на загриженост се недостиг од јавна расправа, проблеми со транспарентноста и имплементација на новите регулативи, ограничени ресурси и обука на изборната администрација, како и недостиг од поддршка на институциите одговорни за спроведување на изборите. Овие проблеми доведуваат до непредвидливост и несигурност на изборниот процес, што може да влијае на неговата стабилност и ефикасност“, кажа Адем Чучуљ, претседател на ДКСК.
Дополнително, само 42 проценти од институциите ја исполниле обврската за пријавување на службените возила, што според комисијата, отвора ризик од нивна злоупотреба. Антикорупциска отворила 43 предмети за можни неправилности, при што во еден случај е поднесена иницијатива за кривично гонење поради злоупотреба на службена должност.
Петар Догов