Македонија има добра законска рамка, но проблемот е неспроведување, има слаб социјален дијалог, отсуство на заштита од дискриминација и нетранспарентно рекламирање со државни пари, заклучиле претставниците на Европскиот економски и социјален комитет по неколкудневните средби со претставници на работодавачите, на синдикатите, на невладиниот сектор и на Владата.
Наредната година претставници од Македонија ќе бидат повикани да дискутираат во рамки на процесот на проширување, а од Комитетот велат дека напредокот на државата не е како што беше очекувано.
Бизнис заедницата треба да биде клучен партнер во економскиот дел на пристапниот процес на Македонија, смета претседателот на Стопанската комора, Бранко Азески.
Вицепремиерот Беким Сали кажа дека процесот на пристапување не е само техничко усогласување со законодавството на ЕУ, туку е трансформација на културата на владеење, јакнење на владеењето на правото, заштита на темелните права и продлабочување на социјалниот дијалог.
Комитетот ќе го изготви извештајот во рок од шест месеци, ќе го објави јавно и достави до Владата, а овој извештај ќе биде поврзан со извештајот за напредокот на државата.
Огнен Чанчаревиќ