Со музика, настапи на артисти и барање за чист воздух, пред главниот влез на цементарница „Усје“ се одржува мирна блокада под паролата „Без Усје полесно се дише“.
Собирот го организира граѓанската иницијатива „Стоп за Усје“ која бара поставување мерни станици околу фабриката со јавно достапни податоци. Сметаат дека со години цементарницата го загадува воздухот и го загрозува здравјето на жителите од околните населби.
„Имаме осум барања. Но, најважно е што бараме да се постават неколку мерни станици околу самата фабрика. Резултатите од мерењето да бидат јавно достапни за, конечно, сите да можат да видат што е вистината. Ние сите имаме очи и нос, може да почуствуваме што се случува. Но, не се поставуват мерни станици за тоа да може да се потврди“, изјави Петар Керамитчиев од иницијативата „Стоп за Усје“.
Од фабриката „Усје“ ги отфрлаат обвинувањата. Велат дека работат според законските прописи.
„Работиме целосно во согласност со сите важечки закони, подзаконски акти и барањата на нашата А Интегрирана еколошка дозвола, честопати применувајќи внатрешни стандарди кои се и построги од законските обврски. Нашите емисии континуирано се мерат преку 24-часовен независен мониторинг, со податоци јавно достапни и редовно доставувани до надлежните органи. Редовните и ненајавените инспекции од страна на надлежните тела не констатираат никакви надминувања на законските лимити“, одговорија од „Усје“ преку соопштение.
Порачуваат дека протестите ќе продолжат се додека институциите не преземат чекори.
Тамара Марковска