Вработените во Владата ќе имаат можност да одат на седум вида на тим билдинг обуки во времетраење од три дена, а тоа граѓаните ќе ги чини пет милиони денари, односно 80.000 евра. Од податоците на сајтот за јавни набавки објавен е тендер каде што се бараат соодветни понудувачи кои владините административци ќе ги возат до Струмица, до Берово и до Охрид, а предвидено е тие да бидат сместени во хотели со минимум 4 ѕвездички со два полни пансиона.
Телма се обрати до Владата која објасни дека обуките за административни службеници се во функција на континуирано, стручно усовршување на вработените, како и нивно професионално надградување и реализирање во работниот процес во најважните области.
„Инвестирањето во обуки е мерка насочена кон унапредување на организациската ефикасност. Меѓу другото, обуките обезбедуваат правилна примена на важечките прописи, односно тоа е инвестиција во човечкиот капитал, кој претставува клучен фактор за одржлив развој и институционална стабилност“, соопштуваат од Владата.
Според документацијата и побарувачката, може да се увиди дека од предвидените тим билдинзи административците ќе имаат прилика да бидат обучувани како да управуваат со човечки ресурси, понатаму ќе се спроведува обука за јавни набавки и канцелариско, архивско работење, како и финансии, сметководство и ревизија.
Дополнително, еден од деловите на предвидените обуки ќе биде посветен на дигитализација и дигитални вештини за административни службеници, каде ќе им се предаваат основи на вештачка интелигенција. А ќе се спроведе и тренинг за применување на закони за општа-управна постапка, управни и работни спорови како и заштита на лични податоци. Огласот за понудувачите е отворен до 4 март, а како предност ќе имаат оние кои понудат најниска цена.
Теа Димковска