Сообраќајот на релација Ресен – Битола по обиколницата што минува низ дивата ромска населба е целосно во прекин од 16:30 часот поради протест на група жители од овој дел на градот.
Тие палат гуми, дрва, ѓубре на коловозот, и објавуваат видеа на социјалните мрежи.
Велат дека протестот е бидејќи полицијата вчера им ги одзела возилата што ги управувале без возачка дозвола.
Од битолската полиција потврдија дека обиколницата е блокирана поради протестите во ромската населба.
Сите возила се пренасочуваат да сообраќаат преку Битола.
Жителите од оваа ромска населба велат дека не можат да најдат возачка дозвола, дека „за да преживеат нивните сопрузи одат да збираат шишиња и старо железо, а полицијата им бара возачка дозвола“.
Попладнево и во кочанската населба Трајаново трло се одржа протест поради новиот закон за одземање возила управувани без возачка дозвола, при што беа запалени гуми на улицата Цветан Димов.
Интервенираа и пожарникарите кои го изгаснаа огнот.
Б.С.