Кривична пријава поднесе Одделението за внатрешни работи Кичево против 51-годишниот Ф. Д. од кичевското село Србица, поради постоење основи на сомнение за сторено кривично дело несовесно работење во службата по член 353 од Кривичниот законик.
Пријавениот Фатмир Дехари во својство на поранешен градоначалник на Општина Кичево, се товари дека несовесно постапувал при извршувањето на своите законски овластувања, прекршувајќи ги одредбите од Законот за локалната самоуправа и Законот за пожарникарство.
Според информациите од ОВР Кичево, кривичното дело е поврзано со вработувањата во Територијалната противпожарна единица (ТППЕ) Кичево.
Ексградоначалникот од 2016 година наваму склучувал годишни договори за вработување со одредени лица во ТППЕ. По истекот на едногодишниот период, тој не извршил должен надзор и пропуштил да им ги прекине работните договори.
Со ваквиот пропуст, како што велат од полицијата, тој дозволил лицата да не се стекнат со соодветниот сертификат за квалификација како пожарникари, издаден од надлежен државен орган.