Вработените од ЈП „Паркови и зеленило“ и фирмите ќерки „Флораком“ и „Луна“ за денеска најавија нов протест поради неисплатена плата за месец септември. Според информациите ќе ги блокираат двата влеза на ЈП „Паркови и зеленило“ во периодот од 7 до 9 часот. Вчера пак со блокада на крстосницата пред Зоолошката градина и булеварот „Илинден“ кај Матично, испратија последно предупредување кон раководството на претпријатието пред како што истакнаа да ги радикализираат протестите. Претседателот на Синдикатот на СУТКОЗ, Стојанче Кашиковски, информираше дека вработените сè уште немаат земено ниту регрес за годишен одмор, јубилејни награди или отпремнина за пензионирани лица. Синдикатот веќе поднел пријави до Државниот инспекторат за труд, како и кривична пријава против директорот за неисплата на К-15.
