Пратениците во Европскиот парламент денеска во Стразбур ќе дебатираат за два предлога за гласање недоверба на Европската комисија предводена од Урсула фон дер Лајен.
Предлозите се поднесени од десничарската група „Патриоти за Европа“ и крајно левичарската „Левица“, а гласање е закажано за четврток.
Главните причини за недоверба се трговските договори со САД и земјите од Меркосур, кои според подносителите се штетни за европските земјоделци, работници и животната средина.
Левицата дополнително ја обвинува Комисијата за молк и неакција околу прекршувањата на меѓународното право во Газа.
И покрај критиките и зголемената поддршка за предлозите, според проценките, шансите за нивно усвојување се мали.
Повеќето европратеници од проевропското мнозинство најверојатно ќе гласаат против, со цел да се избегне политичка нестабилност во институциите на ЕУ.
Б.С.