Војната меѓу Израел и Иран ја вивна цената на нафтата. Утринава се зголеми за 10 долари. Првиот регулатор Бислимовски предупреди ако продолжи овој тренд на раст, апсолутно ќе се одрази и на цените на дериватите во земјава.
За следната недела кога ќе се прави корекција не верувам дека ќе има драстично влијание, но ако продолжи овој тренд на високи цени на нафтените деривати секако дека ќе има влијание и на цената која ќе ја плаќаат корисниците во Македонија, вели претседателот на РКЕ, Марко Бислимовски.
Но, не очекува ваквите ценовни пореметувања да донесат нов бран поскапување и на останатите продукти кои се користат тука, како што се случи претходно.
Имаше цени на нафтени деривати и дизел кој беше 110 денари кога беше причина за голем број поскапувања. Денеска цената на дизелот е 66 , 67 денари, а цените на производите кои што тогаш се покачија не се вратија назад така да не верувам дека тоа ќе има драстично влијание и на останатите продукти кои се користат во државата, додава Бислимовски.
Билсимовски е оптимист дека овој ценовен скок е моментален пик.
Откако, се влоши состојбата на Блискиот Исток глобалната економија повторно се најде под силен удар. Стравот ги раздвижи берзите. Цените на нафтата пораснаа за нешто повеќе од 4 проценти. Според, анализите, ова е најголем дневен пораст од март 2022 година, периодот кога почна војната во Украина.
Ирена Чачкова