Малопродажната цена на литар Еуродизел од ноќеска на полноќ се намалува за еден денар, а бензините Еуросупер БС-95 и Еуросупер БС-98 и екстра лесното масло за домаќинство на (ЕЛ-1) се намалуваат за половина денар за литар. Цената на мазутот М-1 НС се намалува за 1,113 денари за килограм и сега ќе изнесува 36,042 денари за килограм, одлучи денеска Регулаторната комисија за енергетика (РКЕ).
Новата малопродажна цена на Еуросупер БС-95 ќе изнесува 73 денари за литар, а на Еуросупер БС-98 ќе биде 75 денари за литар. Еуродизел и екстра лесното масло за горење (ЕЛ-1) ќе се продаваат за 65 денари за литар, а мазутот М-1 НС ќе се продава за 36,042 денари за килограм. Малопродажната цена на метан за месец мај 2025 година ќе изнесува 60,000 ден./кг. и истата се намалува за – 6,50 ден./кг. во однос на малопродажната цена за месец април која изнесуваше 66,500 ден./кг.
Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,986 отсто, кај дизелот за 2,832 отсто, кај екстра лесното масло за 2,299 отсто и кај мазутот намалувањето е за 4,935 отсто.