Во НБА-лигата утринава на програмата беа четири натпревари. Шампионот Бостон запиша уште една убедлива победа, Далас го доби тексашкото дерби со Сан Антонио, а Денвер загуби пред своите гледачи.
Џејлен Браун со 27 поени и Џејсон Тејтум со 25 поени и 11 скока ги предводеа Селтикс до триумф од 102-122 на гостински паркет кај Вашингтон. Шампионот сега има две победи од два натпревари на стартот од новата сезона.
Далас пред своите навивачи го совлада Сан Антонио со 120-109. Лука Дончиќ имаше 28 поени и 10 скока, додека блескаво деби имаше Клеј Томсон со 22 поени. Виктор Вембањама имаше лоша шутерска вечер за Спарс, па погоди само пет пати од 18 обиди и го заврши натпреварот со 17 поени.
Никола Јокиќ запиша трипл-дабл, но Денвер беше надигран на домашен паркет од Оклахома со 87-102. Српскиот центар реализираше 16 поени, 13 асистенции и 12 скока за Нагетс, но останатите негови соиграчи не беа на нивото. Шаи Гилџеус-Александер со 28 поени и Чет Холмгрен со 25 ги предводеа Тандер до победата.
На последниот натпревар утринава, Сакраменто загуби дома од Минесота со 115-117.