Годинашново, 47 издание на Фестивалот „Денови на македонска музика“, ќе започне в петок (22.март) со концерт на Воениот оркестар на Армијата на РСМ, под диригентска палка на Горан Илијевски. На концертот што ќе се одржи во големата сала на Филхармонијата, ќе бидат изведени дела од македонскит композитори, создадени за голем дувачки оркестар.
- Програмата на „.Денови на македонска музика“ е во знакот на извонредното творештво на македонските композитори од поголем обем: симфониско, оперско, дела за гудачки оркестар, но и камерен опус. Со концертите ќе бидат одбележани и повеќе значајни јубилеи, на композиторите Томислав Зографски, Михајло Николовски, Стојче Тошевски, Живојин Глишиќ, Тодор Трајчевски, но и јубилеите на МРТВ – 80 години од основањето и Н.У. Танец – 75 години од основањето, се вели во дописот од Сојузот на композитори на Македонија, кои ја организираат манифестацијата.Вториот концерт е на 24.03.2024 (недела) во малата сала на Филхармонија, каде камерниот
оркестар „Профундис“ со солисти ќе ги изведат делата на композиторите Гоце Коларовски, Фатос Лумани, Дарија Андовска, Гоце Гавриловски и Ангел Спироски.Програмата на фестивалот вклучува премиерни изведби на дела од помладата генерација, како и изведби што се вбројуваат во ремек-делата на сите генерации композитори. Со свои концерти ќе се вклучат и Националната опера и балет, Филхармонија, камерниот ансамбл „Алтус“, а ќе заврши со традиционалната „Трибина“, посветена на состојбите со творештвото на македонските композитори.
– Уметничкиот одбор и СОКОМ при кониципирање на програмата поаѓа од фактот – домашното уметничко творештво зависи од сите нас, од нашата одговорност и од нашата грижа да овозможиме создавање, изведба и промоција на дела што го означуваат нашето минато, сегашност и иднина, велат од СОКОМ.
Влезот на сите концерти е слободен.